T-TYD IS TEENWOORDIG-TYD

 Ons gemeente se sentrale visie is 24/7 Christen-wees. Daarin verwoord ons die strewe om God se Goeie Nuus in ons hele lewe te integreer. Maar wat beteken 24/7 Christen-wees?

Die kern van 24/7 Christen-wees is Teenwoordigheid. Hoe meer ons meegee aan die ewige teenwoordigheid van God in elke sekonde van ons lewe, kry die beeld van Jesus gestalte in ons lewe. Dit vra ook dat ons werklik teenwoordig sal wees waar en by wie ons ookal is.

Die gedagte van die weeklikse T-Tyd op die kalender is dat lidmate uitgenooi word om die 24/7 waardes van die teenwoordigheid van God by ons en ons teenwoordigheid in die hede te integreer met die lewe.

Tydens Vrydagoggende se T-Tyd (wanneer jy breek vir tee/pouse) kan jy tyd afstaan vir geestelike oefening waar jy in dié Teenwoordigheid kan insak. Die Kontak wat op Donderdae per epos uitgaan en hier gepubliseer word sal riglyne bied vir elke Vrydag se T-Tyd.

Ons gaan weer volgens ons kwartaaltemas werk: eenwees (klem op "wees"/"being"), diens, liefde en vier.

In die eerste kwartaal fokus ons op eenwees. Eenwees beteken dat ons oorgee om al meer een met God te wees wat ons diepste wese aanraak. Dit nooi ons ook uit om eenheid met mekaar te bou en te vier. Aan die einde van elke kwartaal sal ons die tema herbesoek met verhale waar mense die beginsels in hulle lewe geïntegreer het.

Ons nooi jou uit op 'n reis saam met die res van die gemeente om hierdie jaar 24/7 Christen-wees te lééf!

Immanuel van Tonder