Caritas - Uitreik

24/7 Christenwees in die gemeenskap

want ons gee om ...

 Ons glo dat ons gemeente 'n ″gemeenskap van gestuurdes″ is. Ons verklaar dit ook in ons geloofsverklaring (opgestel in die negentigerjare) dat:

″ons in diens van die koninkryk van God betrokke sal raak by die omvattende nood van die wêreld om ons.″

Dit is wat kerkwees beteken ... ″om gestuur te wees″, volgelinge van die Gestuurde Jesus Christus.

Die Caritas-bediening neem oorhoofs verantwoordelikheid vir, onder andere, die koördinering van die gemeente se omgee na ″binne en buite.″ In die gemoedere van lidmate bestaan daar dikwels oorvleueling tussen die ″uitreik na buite en binne″. Dit gaan immers in beide gevalle oor omgee, hulp verlening en betrokkenheid wanneer jy 'n 24/7 lewe deur die Gees leef. Sommige lidmate het gawes om dit naby te doen en ander weer verder, maar dis dieselfde ″aksie″.

As mens jou ore op die grond hou, hoor jy van wonderlike omgee-stories in die gemeenskap deur lidmate wat, sonder dat ander weet, betrokke is by bure, vriende en ander in nood. Ons wil nie net ons onderlinge gemeenskap as gelowiges en bure van nie-lidmate koester en uitbou nie, maar ook ons betrokkenheid by die wyer gemeenskap.

Die Here seën ons gemeente op so baie maniere: met lidmate wat hulle tyd, vaardighede en soveel van hulleself beskikbaar stel; ook op finansiële gebied dra hulle dikwels meer as hulle dankoffer by om 'n verskil in ons wyer gemeenskap te maak.

Kry hier meer inligting oor die uitreike waar ons by betrokke is:

• Gemeente Uitreike
• Gemeente Vroue Uitreike
• Nuwe Generasie Uitreike